പ്രകൃതിയിൽ ലയിക്കാൻ ക്യാമ്പർ!

നിതിന്‍ ആര്‍.വിശ്വന്‍

കാടും മേടും തോടും കടന്നൊരു യാത്ര, മണ്ണിന്റെ മണമറിഞ്ഞ്, നാടിന്റെ സുഖമറിഞ്ഞ്, കാറ്റിന്റെ സുഗന്ധമറിഞ്ഞ് ഒരു യാത്ര. പ്രകൃതിയുടെ ഭാഗമായി, ഈ പ്രപഞ്ചത്തിന്റെ ഒരു ചെറു കണമായി മാറി, ദൈനംദിന ജീവിതത്തിലെ സംഘർഷങ്ങളും സമ്മർദ്ദങ്ങളും മാറ്റിവച്ച് സ്വയം തിരിച്ചറിയുവാൻ ഒരു സ്വപ്ന യാത്ര – ആഗ്രഹിക്കാത്തവരായി ആരെങ്കിലുമുണ്ടാകുമെന്ന് തോന്നുന്നില്ല. എന്നാൽ ആ സ്വപ്നസാക്ഷാത്കാരത്തിനു വഴിയൊരുക്കുകയാണ് ക്യാമ്പർ.കോം എന്ന വെബ്‌സൈറ്റ്. ആർഭാടത്തിന്റെയും പണത്തിന്റെയും അസ്വസ്ഥതയുടെയും ഓട്ടത്തിന്റെയും നാളുകളിൽ നിന്നൊരു മോചനം. ഒരു പുതുനിശ്വാസം.

സൂര്യനുദിക്കുന്നതും കാടിനെ ഇരുട്ട് പൊതിയുന്നതും മഞ്ഞ് പൊഴിയുന്നതുമെല്ലാം ജീവിതത്തിൽ അനുഭവിക്കാത്തവരുടേത് ഒരു തീരാനഷ്ടമാണ്. കൂട്ടുകാരോടൊത്തോ കുടുംബവുമായോ യാത്ര പോകുമ്പോൾപോലും നമ്മൾ എല്ലാവരും പലപ്പോഴും ഹോട്ടലിൽ മുറികളെടുത്ത് താമസിക്കുകയാണ് പതിവ് – ഡബിൾ ബെഡ്, ഫാൻ, ടി.വി., എ.സി. -അങ്ങനെ ഇല്ലാത്തതായി ഒന്നുംതന്നെയില്ല. എന്നാൽ ഭൂമിയുടെ സ്പന്ദനം തൊട്ടറിയുവാനുള്ള അവസരം ലഭിക്കുക എന്ന ഭാഗ്യം ഒന്ന് വേറെ തന്നെ!

പുസ്തകങ്ങളിലും സിനിമകളിലും മാത്രം മലയാളി കണ്ടിട്ടുള്ള ക്യാമ്പിങ് എന്ന സമ്പ്രദായം വിപുലീകരിച്ചുണ്ടാക്കിയതാണ് ക്യാമ്പർ എന്ന സ്റ്റാർട്ടപ്പിന്റെ ആശയം. എറണാകുളം മരട് സ്വദേശി എം.ജെ.പ്രബിലും കണ്ണൂർ സ്വദേശി സൂരജ് രാജനും രൂപം നൽകിയ ഒരു സ്ഥാപനമാണ്‌ ക്യാമ്പർ. പ്രബിലിന് ഐ.ടി. മേഖലയിൽ 12 വർഷത്തെ പരിചയസമ്പത്തും സൂരജിന് ബാങ്കിങ് മേഖലയിൽ 16 വർഷത്തിലധികമുള്ള അനുഭവസമ്പത്തുമാണ് ഉള്ളത്.

മദ്രാസിലെ ഐ. ടി. കമ്പനിയിൽ നിന്നും ജോലി രാജിവെച്ച് പ്രബിൽ 2015 ൽ ഒരു ട്രാവൽ ആപ്പിന് തുടക്കം കുറിച്ചുവെങ്കിലും അതത്ര വിജയമായില്ല. പിന്നീടുള്ള ചർച്ചകളുടെയും കൂട്ടായ്മയുടെയും ഭാഗമായാണ് ക്യാമ്പർ ജന്മമെടുത്തത്. മൂന്നാറിനടുത്തുള്ള മാങ്കുളം എന്ന സ്ഥലത്ത് ക്യാമ്പ് സ്ഥാപിച്ച് കൊണ്ടുതുടങ്ങിയ ക്യാമ്പർ ഇന്ന് രാജ്യത്തോട്ടാകെയുള്ള നൂറിൽ പരം പ്രകൃതിരമണീയ മേഖലകളിലേക്ക് പടർന്നു പന്തലിച്ചിരിക്കുന്നു.

സൂരജും (ഇടത്ത്) പ്രബിലും

ഓൺലൈൻ ആയിട്ടാണ് ബുക്കിങ് സൗകര്യമൊരുക്കിയിട്ടുള്ളത്. അടിസ്ഥാന സൗകര്യങ്ങൾ മുതൽ ഒരു പൂർണ്ണമായ ക്യാമ്പിങ് അനുഭവം നല്കുവാനായുള്ള എല്ലാ സംവിധാനങ്ങളും ഒരുക്കിയിട്ടുണ്ട്. 1,000 രൂപ മുതൽ തുടങ്ങുന്ന നിരക്കുകളിലൂടെ ലഭിക്കുന്ന അനുഭവങ്ങൾ ഒരു ജീവിതകാലം മുഴുവൻ സൂക്ഷിച്ചുവെയ്ക്കുവാൻ കഴിയുന്നവയാണ്.

ക്യാമ്പിങ്ങിനായി വരുന്നവരുടെ സുരക്ഷ, ഭക്ഷണം, അടിസ്ഥാന സൗകര്യങ്ങൾ, ടെന്റുകൾ തുടങ്ങി എന്നിങ്ങനെ ഒരു കാര്യത്തിലും ആശങ്ക വേണ്ട. എല്ലാം സജ്ജമായിരിക്കും. കൂടാതെ ട്രെക്കിങ്ങ്, ജീപ്പ് സഫാരി, വെള്ളച്ചാട്ടങ്ങൾ, കയാക്കിങ്, ബോട്ട് യാത്ര, മീൻപിടിത്തം തുടങ്ങി അനുഭവങ്ങളുടെ ഒരു നിലവറ തുറന്നുതരും ക്യാമ്പർ.

ഇനി ഭക്ഷണം സ്വന്തമായി തയ്യാറാക്കണമെങ്കിൽ അതിനുള്ള സൗകര്യങ്ങളും ഒരുക്കിയിട്ടുണ്ട്, ബാർബീക്യൂ, ക്യാമ്പ് ഫയർ, തുടങ്ങിയവയ്ക്കുള്ള ഒരുക്കങ്ങളും അനുയോജ്യമായ സ്ഥലങ്ങളിൽ ചെയ്തിട്ടുണ്ട്. 2016 സെപ്റ്റംബറിൽ തുറന്ന ഓൺലൈൻ പോർട്ടൽ വളരെ വേഗത്തിൽ തന്നെ ജനപ്രിയമാകുകയും ശ്രദ്ധപിടിക്കുകയും ചെയ്തു.

യാത്രയ്ക്കും ഹോട്ടൽ ബുക്കിങ്ങുകൾക്കുമായിട്ടൊക്കെ ഒട്ടേറെ സൈറ്റുകൾ ലഭ്യമാണെങ്കിലും ക്യാമ്പിങ് എന്ന വേറിട്ട ആശയവുമായി വന്നത് കൊണ്ട് തന്നെ, വെബ്സൈറ്റിന് ലഭിച്ച അംഗീകാരം വളരെയധികമാണ്. കൈകുഞ്ഞുങ്ങൾ മുതൽ 70 വയസ്സ് വരെയുള്ളവർ ഉപഭോക്താക്കളാണെന്നുള്ളത് തന്നെ പ്രായഭേദമന്യേയുള്ള സംരംഭത്തിന്റെ വളർച്ചയ്ക്ക് ഉത്തമ സൂചനയാണ്.

മാത്രമല്ല 40 ശതമാനത്തോളം ഉപഭോക്താക്കൾ കുടുംബങ്ങളാണ് – ഐ. ടി. മേഖലയിലും മറ്റും സംഗതി ഒരു അഡാറ് ഹിറ്റാണെന്നതിനു സംശയം തെല്ല് വേണ്ട. എല്ലാവിധ സുരക്ഷാ സംവിധാനങ്ങളും ഉറപ്പുവരുത്തിക്കൊണ്ടുള്ളതാണ് ക്യാമ്പറിന്റെ പ്രവർത്തനം.

ക്യാമ്പിങ്ങിനു സാധ്യതകളുള്ള മേഖലകളിലെ താത്പര്യമുള്ള സ്ഥലമുടമകളെ സന്ദർശിച്ച്, അവിടെ ഫൊട്ടോഗ്രാഫർമാരും ബ്ലോഗർമാരും റൈഡർമാരും യാത്രികരുമടങ്ങുന്ന ഒരു സ്കൗട്ട് ടീമിനെ അയച്ച്, അവരുടെ നിർദ്ദേശങ്ങൾ തേടി, ആവശ്യമായ മുൻകരുതലുകൾ സ്വീകരിച്ച്, ആവശ്യമായ നിർമ്മാണങ്ങൾ നടത്തി, സൗകര്യങ്ങൾ ഒരുക്കിയാണ് അതൊരു ക്യാമ്പിങ് സൈറ്റ് ആയി ക്യാമ്പർ അവരുടെ ലിസ്റ്റിൽ ഉൾപ്പെടുത്തുന്നത്.

കൊടൈക്കനാൽ, ഊട്ടി, മൂന്നാർ, വാഗമൺ, വയനാട്, പൊന്മുടി, വണ്ടിപ്പെരിയാർ, മാങ്കുളം, യെല്ലപ്പട്ടി, ചിറ്റാർ, രാമക്കൽമേട് തുടങ്ങി തെക്കേ ഇന്ത്യയിൽ തന്നെ ഇരുപതോളം ക്യാമ്പിങ് സൈറ്റുകൾ വെബ്സൈറ്റിൽ ലഭ്യമാണ്. ഓരോ കേന്ദ്രത്തിലും, ഓരോ 6 മാസവും സ്‌കൗട്ടിങ് ടീം പരിശോധനകൾ നടത്തി സാഹചര്യങ്ങൾ വിലയിരുത്തും.

മലമുകളിൽ മഞ്ഞു പെയ്യുന്നതാസ്വദിച്ചു കൊണ്ട്, ക്യാമ്പ് ഫയറിനടുത്ത് ടെൻറിലിരുന്ന്, ഒരു കപ്പ് ചൂട് കാപ്പിയും കുടിച്ച്.. -ഹാ! ആലോചിക്കുമ്പോഴേ മനസ്സിനാകെയൊരു കുളിർമ്മ! വിരസതയും വിഷമങ്ങളും മറക്കാൻ ഒരു യാത്ര എന്ത് കൊണ്ടും നല്ലതാണ്. അപ്പോ എങ്ങനാ, വണ്ടി വിടുകയല്ലേ?

അതേയ്! നീലക്കുറിഞ്ഞി കാണാനും തിരഞ്ഞെടുക്കാം കേട്ടോ! പെട്ടന്നാട്ടെ!

ഈ തരംഗമായിക്കൊണ്ടിരിക്കുന്ന ആശയത്തെപ്പറ്റി കൂടുതലറിയുവാൻ സന്ദർശിക്കൂ – www.campper.com

LEAVE A REPLY

Please enter your comment!
Please enter your name here

Must Read

- Advertisment -

Latest Posts

“ഈ ദ്വീപിലേക്ക് ആരും വരരുതേ”; വിഷസർപ്പങ്ങൾ നിറഞ്ഞ ബ്രസീലിയൻ ദ്വീപ് 

വെള്ളത്താൽ ചുറ്റപ്പെട്ടു കിടക്കുന്ന ദ്വീപുകളും തുരുത്തുകളും എന്നും ഒരു മനുഷ്യന് കൗതുകമാണ്. തങ്ങളുടെ രാജ്യാതിർത്തികളിൽ വരുന്ന ദ്വീപുകൾ വിനോദസഞ്ചാര യോഗ്യമാക്കി സഞ്ചാരികളെ ആകർഷിക്കുക എന്നത് ഒട്ടുമിക്ക രാജ്യങ്ങളും ചെയ്തു വരുന്ന ഒരു കാര്യമാണ്....

പ്ലാസ്റ്റിക്കിൽ കരിയർ പടുത്തുയർത്താൻ സിപ്പെറ്റ്

Lorance Mathew Industries Extension Officer, Dept. of Industries and Commerce, Govt. of Kerala.  [email protected] മനുഷ്യ ജീവിതവുമായി പ്ലാസ്റ്റിക്കിനേപ്പോലെ ഇഴുകി ചേർന്നൊരു വസ്തുവില്ലായെന്ന് പറഞ്ഞാൽ അത് ഒട്ടും അതിശയോക്തിയാവില്ല. ഭാരക്കുറവ്, ഈട്, മൃദുത്വം, കരുത്ത്,...

കിലോഗ്രാം ഇനി പഴയ കിലോഗ്രാം അല്ല. പുതിയ മാറ്റം ഇന്ത്യയും സ്വീകരിച്ചു.

AKHIL G Managing Editor | NowNext  തൂക്കത്തിന്‍റെ അടിസ്ഥാനഘടകമായ കിലോഗ്രാമിന്‍റെ തൂക്കം ഇനി പഴയപോലെ ആകില്ല. പുതിയ കിലോഗ്രാം മാറ്റം തിങ്കളാഴ്ച മുതലാണ് പ്രാബല്യത്തിൽ വന്നത്. പുതിയ മാറ്റം ഇന്ത്യയും സ്വീകരിച്ചുകഴിഞ്ഞു. എന്നാൽ ദൈനംദിന...

മാധ്യമ പ്രവർത്തകരായിക്കൂടെ

Lorance Mathew Industries Extension Officer, Dept. of Industries and Commerce, Govt. of Kerala.  [email protected] കാഴ്ചയുടെ മൂന്നാം കണ്ണ് എന്ന് വിശേഷിപ്പിക്കാം മാധ്യമ പ്രവർത്തനത്തെ. സമയ ബന്ധിതമല്ലാത്ത ജോലിയല്ലാത്തതിനാൽ മടിയന്മാർക്കുള്ളതല്ല ഈ മേഖല. ഏത്...

കൊമേഴ്സ്യൽ പൈലറ്റ് – ഉയരങ്ങളിലെ കരിയർ

Lorance Mathew Industries Extension Officer, Dept. of Industries and Commerce, Govt. of Kerala.  [email protected] യാത്രക്കാരേയും ചരക്കു സാമഗ്രകികളേയും വഹിച്ചു കൊണ്ടുള്ള വിമാനങ്ങൾ പറത്തുന്ന പൈലറ്റുമാരെയാണു കൊമേഴ്സ്യൽ പൈലറ്റ് എന്ന് വിളിക്കുന്നത്. നല്ല ആശയ...