2021ലെ നാഷനല്‍ ഡിഫന്‍സ് അക്കാദമി, നേവല്‍ അക്കാദമി പരീക്ഷ ഏപ്രില്‍ 19ന് ദേശീയതലത്തില്‍ നടത്തുമെന്ന് യു.പി.എസ്.സി അറിയിച്ചു. പരീക്ഷ എഴുതാന്‍ ആഗ്രഹിക്കുന്ന ഉദ്യോഗാര്‍ത്ഥികള്‍ അപേക്ഷ ഓണ്‍ലൈനായി ജനുവരി 19നകം സമര്‍പ്പിക്കണം. പ്ലസ് ടു വിജയിച്ച അവിവാഹിതരായ ആണ്‍കുട്ടികള്‍ക്കാണ് അവസരം. ആര്‍മി, നേവി, ഫയര്‍ഫോഴ്സ് വിഭാഗങ്ങളില്‍ 147ാമത് കോഴ്സിലേക്കും. നേവല്‍ അക്കാദമിയുടെ നൂറ്റി ഒന്‍പതാമത് കോഴ്സിലേക്കുമുള്ള സെലക്ഷന്‍ ടെസ്റ്റാണിത്. കോഴ്സുകള്‍ 2022 ജനുവരി രണ്ടിന് ആരംഭിക്കും. ആകെ 400 ഒഴിവുകള്‍.
നാഷനല്‍ ഡിഫന്‍സ് അക്കാദമിയില്‍ 370 (ആര്‍മി -208, നേവി -42, എയര്‍ഫോഴ്സ്-120), നേവല്‍ അക്കാദമിഗില്‍ -30 എന്നിങ്ങനെയാണ് ഓരോ വിഭാഗത്തിലും ലഭ്യമായ ഒഴിവുകള്‍. പരിശീലനം പൂര്‍ത്തിയാക്കുന്ന കേഡറ്റുകളെ ലഫ്റ്റനന്‍റ്/സബ് ലഫ്റ്റനന്‍റ്/ ട്രെയ്നിങ് കേന്ദ്രങ്ങളിലായി നിയമിക്കും.
എന്‍.ഡി.എ ആര്‍മി വിംഗിലേക്ക് പ്ലസ് ടു/തത്തുല്യ ബോര്‍ഡ് പരീക്ഷ പാസായവര്‍ക്ക് അപേക്ഷിക്കാം. എയര്‍ഫോഴ്സ്, നേവല്‍ വിഭാഗങ്ങളിലേക്കും നേവല്‍ അക്കാദമിയിലേക്കും ഫിസിക്സ്, കെമിസ്ട്രി, മാത്തമാറ്റിക്സ് വിഷയങ്ങള്‍ പഠിച്ച്‌ പ്ലസ് ടു തത്തുല്യ പരീക്ഷ പാസായിട്ടുള്ളവര്‍ക്ക് അപേക്ഷിക്കാന്‍ അര്‍ഹതയുണ്ട്. ഫൈനല്‍ യോഗ്യതാ പരീക്ഷയെഴുതുന്നവരെയും പരിഗണിക്കും.
2002 ജൂലൈ രണ്ടിനും 2005 ജൂലൈ ഒന്നിനും മധ്യേ ജനിച്ചവരാകണം. മെഡിക്കല്‍, ഫിസിക്കല്‍ ഫിറ്റ്നസ് ഉണ്ടായിരിക്കണം. വിജ്ഞാപനം www.upsc.gov.inല്‍ ലഭ്യമാണ്. അപേക്ഷ ഓണ്‍ലൈനായി http://upsconline.nic.inല്‍ ജനുവരി 19 വരെ സ്വീകരിക്കും. അപേക്ഷാഫീസ് 100 രൂപ. പട്ടികജാതി/വര്‍ഗ ഉദ്യോഗാര്‍ഥികള്‍ക്കും ജെ.സി.ജ/എന്‍.സി.ഒമാരുടെ കുട്ടികള്‍ക്കും ഫീസില്ല. അപേക്ഷ സമര്‍പ്പണത്തിനുള്ള നിര്‍ദേശങ്ങള്‍ വിജ്ഞാപനത്തിലുണ്ട്.
യു.പി.എസ്.സിയുടെ എഴുത്തുപരീക്ഷ, സര്‍വീസസ് സെലക്ഷന്‍ ബോര്‍ഡ് (എസ്.എസ്.ബി) പരീക്ഷ, അഭിമുഖം എന്നിവയുടെ അടിസ്ഥാനത്തിലാണ് സെലക്ഷന്‍. എസ്.എസ്.ബി ടെസ്റ്റും അഭിമുഖവും 2021 ജൂലൈ-സെപ്റ്റംബര്‍ മാസങ്ങളിലുണ്ടാവും. എന്‍.ഡി.എ/നേവല്‍ അക്കാദമി പരീക്ഷക്ക് കേരളത്തില്‍ കൊച്ചിയും തിരുവനന്തപുരവും പരീക്ഷാകേന്ദ്രങ്ങളാണ്.
പഠനപരീശീലനങ്ങള്‍ പൂര്‍ത്തിയാകുന്നവര്‍ക്ക് ബി.എസ്സി/ബി.എ/ബി.ടെക് ബിരുദങ്ങള്‍ സമ്മാനിക്കും.പരിശീലന കാലം 56100 രൂപ പ്രതിമാസം സ്റ്റൈപ്പന്‍റ് ലഭിക്കും. പരിശീലനം പൂര്‍ത്തിയാകുന്ന കേഡറ്റുകളെ 56100-77500 രൂപ ശമ്ബളത്തില്‍ ഓഫിസറായി നിയമിക്കും.
